Hastedt gewinnt dat teinte Mol anne Tuur den Urkampf

De Urkampf twischen de beiden Urspungsdörper vun den Geestdörper-Bosselvereen hett eene lange Tradition. Dat fung fröher mol mit Bosseln vun de Füerwehren an, siet rech een poor Johren löpt dat in de Dörper ook ohne Füerwehr. Domols hebbt de Frestedter de Hastedter noch mannigmoll orndli een bipuult, intwischen hett Hastedt overs ganz kloor de Oberhand gewunnen. Obwohl dat Dörp Frestedt rech wat lütter is as Hastedt, schafft se dat liekers, 20 starke Bosslers op de Rull to kriegen, de in Urkampf gegen Hastedt antreet. 
Düsset Johr gung dat vun Frestedt no Hastedt hin, deswegen dreepen wi Hastedter uns um halfi negen in de Duppeleek, vun wo ut dat no Frestedt hingung.

Op den ehemoligen Sportplatz geef dat vör den Wettkampf noch dat Grupenfoto mit beide Mannschaften, dorno güng dat aff in de natte Frestedter Feldmark.  

Thies Groth hett op de Koppel noch gau siene Rull klormokt un denn gung dat dor wieter, wo sich fröh an Morgen al Patrick Groth un Julius Voß affschmeeten haln. Wegen de Super-Würfe vun Patrick steek de Frestedter Fohn so bummelig 15 Meter vör de Hastedter Fohn, so dat de Frestedter mit Heimvördeel und Vortoch int Rennen güngen,

In de natten Frestedter Wischen keem de Hastedter allerdings rech wat beeter klor, so dat wi al gau dat erste und tweete Schot bejubeln kunn.

An de Grenz no Hastedt hin kreeg man langsom fasteren Foot un dat geef veele schöne Würfe un blots weenige Bleiers  to seen.

Op drögeren heimischen Grund un mit moralische Ünnerstützung vun de intwischen dorto kommenen Bürgermeisters keemen de Hastedter nu richti bovenop un kreegen denn ook Schott Nummer dree un veer.

De Fairness halber mutt mann seggen, dat Hastedt twischendörch nochmol een Schott weller insetten musste, dat wi overs gau wedder torüch kreegen.

Toon Schluss klöter noch een Hastedter Schmieter de Bossel  ordnli gegen een Boom und Nils Rohde schmeet op Frestedter Siet noch bannich wiet, so dat ok dat veerte Schott noch weller insett worn is. An En weern dat denn 3 Schott und 34 Meter Kiekut, de de Hastedter an Enn vörn leegen, nodem wi al vun Frestedt aff an souverän vörn leegen. In den Bericht vun Thomas Hohn köhnt ju de Eenzelheiten nochmols nolesen => Hahnes Text

No den letztn Wurf patt Thies Groth und Sönke Köhler de Streck twischen de beiden Kugeln aff. Mit Sönke as professionellen Katasterbeamten kann dor je nix scheefgohn.

Wenn anners een knipst, koom ik ok mol op Bild...

Bescheiden as wi Hastedters nu mol sünd, överloot wi de Frestedter Gäste geern den ersten Deel vun de Affschlussreden. Links Uwe Schwieger mit den Wanderpokal, denn Hauke Zimmermann jüst överreicht hett, rechts de Bossel-Oplüüd Thies Groth mit Jan Sellenthin und Florian Kewitsch.

Op den Sool in de Duppeleek kunn man sick dat bi deftigen Gulasch good gohn loten un bi gemütliched Tosomensitten noch een poor Expertisen to den Wettkampf toon Besten geven.